Təhsil müddətim ərzində həm akademik göstəricilərim, həm də sosial fəallığım sayəsində müxtəlif istiqamətlər üzrə bir çox təqaüd, təlim və proqramlarda iştirak etmişəm. Qazandığım sertifikatlar, bilik və bacarıqlarımın inkişafında, xüsusilə də texnologiya sahəsində daha peşəkar yanaşma formalaşdırmağımda mühüm rol oynayıb.

Java Backend sahəsinə olan marağım məni müxtəlif təqaüd proqramlarına qatılmağa sövq edib. Matrix Academy-də Java Backend Development üzrə keçdiyim 100% təqaüdlü intensiv təlimdə həm nəzəri biliklər, həm də real layihə əsaslı təcrübə əldə etmişəm. Bu təqaüdə 1000-dən çox xanım arasından seçilərək layiq görülməyim sahəyə olan motivasiyamı və potensialımı daha da artırıb. Bundan əvvəl isə Matrix Academy-nin Pre-coding proqramını da 100% təqaüdlə tamamlamış və 74 nəfər arasından qalib seçilmişəm.

Bununla yanaşı, “Baku American Center”də Java Backend foundation təlimini, Technest tərəfindən maliyyələşdirilən “Yeni Fikir” və Technest birgə proqramı çərçivəsində IT Project Management təlimini də 100% təqaüdlə bitirmişəm. Bu kurslar məndə layihə idarəetməsi, analitik düşüncə, komanda işi və texniki sistemlərin planlanması üzrə güclü baza formalaşdırıb.

Təhsil və karyera inkişafımla yanaşı, sosial və ictimai fəaliyyətlərdə də aktiv olmuşam. “BMU Qarabağ” Klubu, “ADA Qalaktika Cəmiyyəti”, GDSC-BEU, Mind Mavericks Intellectual Club və “Əbədi Birlik” kimi təşkilatlarda müxtəlif tədbirlərdə, layihələrdə və könüllü proqramlarında iştirak edərək həm liderlik, həm də komanda bacarıqlarımı inkişaf etdirmişəm. Bu fəaliyyətlər məni daha çevik, məsuliyyətli və sosial baxımdan aktiv biri kimi formalaşdırıb.